Boneiru ta representá na e terser Konferensia Regional di CARICOM tokante Reparashon, ku ta tuma lugá na Barbados for di 17 te ku 19 di sèptèmber. E delegashon ta konsistí di Líder di Partido Pueblo Progresivo (PPP), James Finies, i Presidente di Bonaire Human Rights Organization (BHRO), Davika Bissessar Shaw.

Bissessar Shaw ta Miembro Asosiá di Komishon di Reparashon di CARICOM. E konferensia ta reuní representantenan gubernamental, akademikonan, investigadónan i defensornan di reparashon for di diferente pais i teritorionan den Karibe.

Advertisement

Entre e partisipante prominente nan ta Profesor Verene Shepherd, Sir Hilary Beckles, Promé Minister di Barbados Mia Mottley i eks-Promé Minister di St. Vincent i Grenadines Ralph Gonsalves. E evento ta forma parti di e proseso regional pa sigui desaroyá diskushon tokante reparashon pa konsekuensianan históriko di sklabitut i kolonialismo.

E promé Konferensia Regional di CARICOM tokante Reparashon a tuma lugá na St. Vincent i Grenadines na 2013, siguí pa un di dos konferensia na Antigua i Barbuda na 2014. Barbados ta anfitrion di e terser edishon di e evento.

Segun PPP i BHRO, durante e konferensia lo presentá aportenan relashoná ku CARICOM 10-Point Plan for Reparatory Justice. E intenshon ta, ku tema di kolonialismo i deskolonisashon mester forma parti di diskushon tokante hustisia reparativo, partikularmente pa teritorionan ku ainda ta mantené relashonnan konstitushonal i kolonial.

Durante presentashon prepará, Finies lo trata diferente aspekto di historia di Boneiru, inkluyendo ròl ku personanan sklabisá di desendensia Afrikano a hunga den desaroyo ekonómiko di Boneiru durante periodo kolonial. Tambe lo diskutí importansia históriko di e industria di salu di Boneiru den ekonomia kolonial Hulandes.

Segun informashon presentá pa e delegashon, e produkshon di salu na Boneiru tabata dependé ampliamente di trabou di personanan sklabisá den saliñanan. E tema históriko di sklabitut i su efektonan a largo plaso ta forma un elemento importante den diskushonnan tokante reparashon den Karibe.