Entre sèptèmber 2026 i desèmber 2026, Ofisina Sentral di Estadístika (CBS) lo ehekutá Investigashon di Forsa Laboral (AKO) na Boneiru, Sint Eustatius i Saba. Durante e periodo aki, entrevistadónan di CBS lo bishitá kasnan di famia selektá pa hasi pregunta tokante empleo, desempleo i otro tema relashoná ku merkado laboral.

AKO ta un investigashon ku CBS ta realisá kada dos aña pa midi desaroyonan den merkado laboral di Hulanda Karibense. Un di e resultado mas importante di e investigashon ta porsentahe di desempleo, ku ta indiká kua parti di poblashon aktivo ta buskando trabou. Ademas, e investigashon ta reuní informashon tokante partisipashon laboral, nivel di estudio, tipo di trabou i kantidat di ora trabou.

Advertisement

Pa por optené un bista mas kompletu i konfiabel di e situashon laboral riba e islanan, CBS ta apelá pa koperashon di tur kas di famia ku a keda selektá pa partisipá. Na Boneiru, 1.233 kas di famia lo wòrdu aserká, kompará ku 578 na Sint Eustatius i 571 na Saba.

CBS ta enfatisá ku tur informashon kolektá durante e investigashon lo wòrdu tratá di forma estriktamente konfidensial, segun disposishonnan legal ku ta apliká. E organisashon a indiká ku a tuma diferente medida pa protehá datonan kolektá i ku tur entrevistadó ta obligá pa mantené konfidensialidat.

Habitantenan ta wòrdu rekordá ku tur entrevistadó di CBS mester por legitimá su mes ora ku nan presentá na un kas di famia. Di e manera aki, residente por ta sigur ku nan ta trata ku un representante ofisial di CBS. Segun CBS, e datonan kolektá no lo wòrdu kompartí ku terseronan ni ku otro instansianan gubernamental.

Pa mas informashon òf pregunta, residente por tuma kontakto ku CBS.