Curoil a duna un aklarashon tokante logístika i proseso di distribushon di silinder di gas na Boneiru, pa kual tabatin retraso i fila largu di kliente na nan planta di Kaya Arawak.

Representante di Curoil via telefòn a splika ku e logístika pa kumpra i trese gas na Boneiru ta enbolbí diferente partido. E proseso ta kuminsá na e planta di Curoil na Kòrsou, kaminda ta yena e silindernan. Despues nan ta bai den container via barku pa yega Boneiru, unda nan tin ku pasa douana promé i despues por keda transportá pa e terminal na Kaya Arawak.

Segun Sabina Curiel di Curoil, e demanda pa gas na Boneiru a konosé un oumento signifikante. Entre inisio di aña 2025 i inisio di  aña 2026, konsumo di gas di 20 liber a krese ku aproksimadamente 9%. Aktualmente Curoil ta risibí 2 container ku un total di 380 silinder pa siman, lokual en prinsipio ta sufisiente pa e konsumo aktual.

E reto prinsipal na e momento aki ta limitashon di almasená na e planta. E permit aktual ku Curoil tin no ta permití pa tene mas ku 500 silinder pareu riba e tereno na Boneiru. Pa e motibu aki, Curoil no por krea un "buffer" pa apsorbé kualke posibel retraso den e kadena di logístika of barkunan di transporte.

Pa solushoná e problema aki strukturalmente, Curoil ta den kontakto estrecho pa aselerá e pèrmitnan nesesario ku lo permití ampliá e infrastruktura na Boneiru i almasená mas silinder pa garantisá un fluho di distribushon mas stabil pa henter komunidat.

Advertisement