Polis a detené dos shofùr durante e wikènt ku a pasa despues ku nan tabata maneha bou di influensia di alkohòl. Den ámbos kaso, e sospechosonan a resultá positivo durante tèst di supla i polis a konfiská nan reibeweis.

E promé detenshon a tuma lugá djasabra 27 di yüni, alrededor di 12.15 or di mardugá, na Kaya Krabe. Un hòmber di 76 aña, ku polis a identifiká ku e inisialnan M.A.R.N., a pèrdè kòntròl di su pikòp i a dal kontra un palu di lus.

Konforme prosedura di “botsen is blazen”, e shofùr a keda someté na un tèst di alkohòl. E resultado a mustra ku e tabata bou di influensia di alkohòl mas tantu ku e límite permití pa lei. Komo resultado, polis a konfiská su reibeweis.

Djadumingu 28 di yüni alrededor di 2.45 or di mardugá, polis a detené un di dos shofùr na Kaya Gilberto F. (Betico) Croes. Ta trata di un hòmber di 29 aña di edat ku e inisialnan A.J.A.

Segun polis, un patruya a para e vehíkulo despues ku e shofùr tabata kore zeilu. Durante e kòntròl, e agente nan a opservá varios indikashon ku e persona tabata bou di influensia di alkohòl. Un tèst di supla posteriormente a konfirmá ku el a konsumí mas alkohòl ku ta permití pa lei. Tambe den e kaso aki, polis a konfiská reibeweis di e shofùr.

Ambos sospechoso a keda transportá pa warda di polis pa proseso adishonal. Nan lo mester komparese pa e trámitenan legal korespondiente i nan a risibí un prosès-verbal.

Advertisement