Echo Bonaire ta pidi pa protehá nos loranan i ta klarifiká tokante bario di Amboina despues di insidente di tiramentu di lora

Naturalesa i Medio Ambiente

Echo Bonaire ta pidi pa protehá nos loranan i ta klarifiká tokante bario di Amboina despues di insidente di tiramentu di lora

Pa LJ 04 Aug, 2026 5 Min Lesa 6 Bishitante

Despues di un reportahe lamentabel ku a salí na kla siman pasa tokante vários lora ku a keda tirá i heridá den bario di Amboina, e organisashon di konservashon di naturalesa Echo Fundation Bonaire a duna un aklarashon pa pone kosnan den un mihó lus i eksigí pa e aktonan no sosodé mas.

General Manager di Echo Bonaire, Bienvenido “Chopa” Koffie, a sali na defensa di e habitantenan di Amboina, aklarando ku no ta henter e bario ta enbolbí den e akto sin piedat aki. Koffie a enfatisá ku e nòmber di Amboina no mag keda manchá pa akshonnan iresponsabel di un solo persona.

Segun e fundashon, nan tin konosementu kaba di ken ta e individuo responsabel pa e masakre i e molester kousá na e loranan den e area.

Komo ku e kaso aki ta enbolbí uso di arma di kandela den un zona habitá ,loke ta representá un peliger no solamente pa e fauna pero tambe pa e seguridat di bisiñanan, Echo Bonaire a tuma paso formal i a entregá un keho ofisial na outoridatnan polisial. Ku esaki, e fundashon ta spera ku polis lo atendé e situashon i responsabilisá e persona responsabel.

Den e mes un rosea, Bienvenido “Chopa” Koffie ta hasi un yamada na e persona responsabel pa e respetá norma i balornan tradishonal di Boneiru, kaminda e kuido i amor pa nos naturalesa semper tabata i lo keda sentral.

Koffie a rekordá komunidat ku semper tin solushonnan alternativo i sostenibel pa protehá matanan of fruta sin tin mester di rekurí na e herida òf mata e lora ku ta un di e símbolonan di mas balioso di nos flora i fauna lokal.