Parlamento Europeo a duna lus bèrdè pa un seri di reglanan nobo ku mester hasi deportashon di personanan for di paisnan no miembro di Union Europeo, ku no tin derecho legal pa keda den Europa, mas lihé i mas efektivo.

E 'Return Regulation' nobo ta forma parti di un kambio grandi den maneho di migrashon di Union Europeo. E meta prinsipal ta pa redusí e kantidat di personanan ku, despues di risibí un desishon final ku nan no por keda den Europa, ta sigui biba den un pais miembro sin pèrmit.

Advertisement

Bou di e reglanan nobo, un persona ku no tin derecho legal pa keda ta obligá pa sali di e pais miembro korespondiente i pa kooperá ku e outoridatnan durante e proseso. E sistema tambe ta introdusí un manera mas uniforme pa paisnan miembro trata si un persona ke bini bèk Europa, e lo ser fásilmente rekonosé den un otro pais di Union Europeo. 

Un di e partinan mas diskutí di e lei ta e posibilidat pa establesé “return hubs”, òf sentronan di retornashon, den paisnan pafó di Unión Europeo. Segun e akuerdo, paisnan miembro por usa esaki komo sentronan temporal òf, determiná akuerdonan, pa mandá personanan ku no tin derecho di permanensia na un pais terser. 

E medida a krea hopi debate den Europa. Union Europeo ta argumentá ku e sistema aktual no ta funshoná sufisientemente bon, ya ku solamente un parti di e personanan ku risibí un òrdu di salida realmente ta bai for di e Unión Europeo. Un sistema mas kla i uniforme lo yuda paisnan miembro kontrolá migrashon irregular mas efektivo.

Na otro banda, tin persona nan preokupá ku e reglanan nobo por debilitá protekshonnan legal i humanitario pa migrantenan i solisitantenan di asil. Organisashonnan di derechonan humano a pone pregunta tokante e uso di sentronan di retornashon pafó di Europa i e posibilidat ku personanan por keda mas alehá di supervishon hudisial.

E Return Regulation nobo ta sigui e Pakto Europeo riba Migrashon i Asil, ku a bira aplikabel na yüni 2026. Ku e kambionan aki, Unión Europeo ta manda un mensahe kla: personanan ku no tin derecho legal pa keda den e bloke lo enfrentá un proseso di retornashon mas estrikto, mas uniform i, segun e intenshon di e regulashon nobo, muchu mas lihé.