Aktividatnan pa adulto mayor di Fundashon Plataforma Kultural (FPK) lo tuma lugá na un lokashon nobo for di mitar di sèptèmber 2026. E aktividatnan lo ta na Kunuku Allee, situá na Kaminda Lac 38.

Segun informashon di FPK, durante lunanan di aprel, mei i yüni 2026, por lo menos 100 adulto mayor a partisipá semanalmente den e diferente aktividat. En total, e aktividatnan a registrá 1.249 bishita durante e periodo aki.

Advertisement

Na e lokashon nobo, FPK lo sigui ofresé programa pa adulto mayor ku enfoke riba músika, kultura, moveshon i kreatividat. E aktividatnan ta brinda oportunidat pa partisipantenan topa ku otro i partisipá den aktividatnan kultural i sosial.

Skema di aktividat

Djamars

• 10:30 a.m. – 12:00 p.m. – Hasi músika, kanta i baila ku Gibi
• 2:00 p.m. – 4:00 p.m. – Les di kuarta avansá ku Francis
• 4:30 p.m. – 5:30 p.m. – Les di baile folklóriko

Djarason

• 9:00 a.m. – 10:30 a.m. – Les di kuarta pa prinsipiante
• 10:30 a.m. – 12:00 p.m. – Hasi músika, kanta i baila ku Gibi

Djabièrnè

• 10:00 a.m. – 12:00 p.m. – Mainta kreativo ku Renate

FPK ta indiká ku e organisashon ta traha huntu ku diferente instansia sosial i di kuido na  Boneiru i ku tin plan pa sigui desaroyá e kolaborashonnan aki.

Ademas, FPK ta prepará pa kuminsá ku un kor pa adulto mayor. Interesadonan por bishitá FPK na Kunuku Allee, Kaminda Lac 38, pa mas informashon tokante e aktividatnan.