Ghana a organisá konferensia di konsulta "Next Steps", ku a reuní hefe di estado, ministernan, ekspertonan legal, akademiko, lidernan di sosiedat sivil i representante di diaspora Afrikano pa determiná siguiente pasonan den lucha pa hustisia reparatorio.

E konferensia, ku a tuma lugá na Accra for di 17 te 19 di yüni, tabatin komo meta di konvertí e resolushon históriko di Nashonnan Uní tokante e komèrsio transatlántiko di personanan sklavisá den akshonnan konkreto. Delegadonan for di mas ku 80 pais a deliberá riba medidanan legal, diplomátiko i ekonómiko pa promové reparashon pa Afrika i su diaspora.

Na fin di e konferensia, partisipantenan a aprobá un Kuadro Global di Hustisia Reparatorio ku ta kontené 19 rekomendashon. Entre nan ta e yamada na paisnan i institushonnan ku a benefisiá di komèrsio di personanan sklavisá pa ofresé un diskulpa formal, sostené retorno di artefaktonan kultural i restunan humano, konsiderá kompensashon finansiero, alivio di debe i otro medidanan pa koregí e konsekuensianan duradero di sklabitut i kolonialismo.

Presidente di Ghana, John Dramani Mahama, a bisa ku e konferensia ta marka un momentu importante den e moveshon mundial pa reparashon. El a enfatisá ku rekonosé pasado no ta sufisiente, pero ku awor ta tempu pa akshon i kooperashon internashonal.

E dokumento aprobá na Accra lo keda presentá na e siguiente seshon di Asamblea General di Nashonnan Uní, kaminda paisnan Afrikano i di Karibe lo sigui buska mas sosten internashonal pa e proseso di hustisia reparatorio.

E Konferensia "Next Steps" a keda konsiderá komo un paso importante den e esfuerso mundial pa transformá diskushonnan tokante sklabitut i kolonialismo den maneho i medidanan konkreto ku por kontribuí na hustisia históriko.

Riba 25 di mart 2026, Hulanda a apstené votashon históriko den Asamblea General di Nashonanan Uni riba un resolushon ku a deklará tráfiko transatlántiko di Afrikanonan sklavisá i komersio di sklabitut komo “e krimen mas grave kontra humanidat”. E resolushon, impulsá pa Ghana, a haña sosten di 123 pais, miéntras 52 pais, inkluyendo Hulanda i otro miembronan di Union Europeo, a apstené.

Advertisement