Un grupo nobo di Estudio Básiko di Polis i Wardakosta (BOPK) a finalisá su periodo di introdukshon di kuater siman i a kuminsá ofisialmente ku formashon di dos aña.

E klousura di e periodo di introdukshon a tuma lugá, 7 di sèptèmber, na e Base di Marina Parera na Kòrsou. E seremonia ta marka e final di promé fase intensivo i inisio di e programa di formashon.

Advertisement

E grupo ta konsistí di 23 aspirante: 13 di Wardakosta, sinku di Kuerpo Polisial Hulanda Karibense (KPCN) i sinku di Kuerpo Polisial Sint Maarten (KPSM).

Kuater siman di periodo di introdukshon

Durante periodo di introdukshon di kuater siman, aspirantenan a sigui un programa ku tabata enfoká riba desaroyo personal, resistensia físiko i mental, kolaborashon, disiplina i abilidatnan profeshonal. Segun e organisashon, un parti importante di e periodo tabata siña e aspirantenan pa traha huntu komo un tim.

E periodo di introdukshon a sera ku un treinen final. Despues di e treinen, e grupo a regresá huntu na e Base di Marina Parera, kaminda nan a keda risibí ku asina yamá ‘binnenklappen’, un tradishon kaminda koleganan ta duna nan un aplouso di bonbiní.

Durante próksimo dos aña, e aspirantenan lo sigui ku nan formashon i preparashon pa nan futuro trabou den Wardakosta i kuerponan polisial.

E programa lo enfoká, entre otro, riba konosementu profeshonal, abilidatnan operashonal, integridat, kolaborashon i kapasidat pa aktua di manera profeshonal bou di diferente sirkunstansia. E formashon konhunto ta reuní aspirantenan di diferente servisionan di seguridat den parti Karibense di Reino.