Kolegio Ehekutivo di Boneiru a stipulá ofisialmente Plan di Klima Boneiru, un plan stratégiko ku ta sirbi komo mapa pa prepará Boneiru pa retonan di kambio di klima te ku aña 2050.

E plan ta resultado di un proseso amplio di konsultashon ku a kuminsá na 2024 mediante Mesa di Klima Boneiru. Durante dos aña, residente, empresarionan, organisashonnan sosial, hóbennan, ekspertonan i representantenan di gobièrnu a kontribuí ku ideanan i eksperensianan pa desaroyá un vishon kompartí pa futuro di Boneiru.

Advertisement

Segun e Plan di Klima, Boneiru ta eksperensiá efektonan di kambio di klima kaba. Entre e señalnan mas visibel tin temperatura ku ta subi, periodonan mas largu di sekura, yobidanan mas fuerte i subida gradual di nivel di laman. E desaroyonan aki ta forma un riesgo pa naturalesa, ekonomia, infrastruktura i bienestar di komunidat.

E plan ta basa riba kuater seguridat prinsipal: seguridat di awa, seguridat di energia, seguridat di kuminda i seguridat di eksistensia. Segun e dokumento, e áreanan aki ta fundamental pa garantisá ku Boneiru por keda resistente i prepará pa futuro.

Pa logra esaki, e Plan di Klima ta proponé kuater programa stratégiko:

• Awa i Tera

E programa aki ta enfoká riba konservashon di awa i lucha kontra sekura. Entre e medidanan tin restorashon di dam i roinan, kolektá awa di yobida na skolnan i edifisionan komunitario, mehorá maneho di pastoreo i sosten pa agrikultura ku ta adaptá na klima.

• Kosta i Rif

Pa protehá kosta i rif di koral, e plan ta proponé zona sin konstrukshon den área nan mas vulnerabel, mihó maneho di awa sushi, restorashon di palunan di mangel i koral, i monitorisashon mas intensivo di salú di rif.

• Barionan, Salú i Ambiente di Biba

Den e programa aki ta inkluí plantamentu di mas palu i área berde, kreashon di mas lugá ku sombra, renobashon di kasnan sosial pa resistí mihó na klima, i medidanan pa protehá gruponan vulnerabel durante periodonan di kalor ekstremo.

• Gobernashon, Konosementu i Ehekushon

E último programa ta enfoká riba e implementashon di e plan. Esaki ta inkluí kreashon di un organisashon di ehekushon ku presupuesto propio, un sistema di atvertensia tempran pa situashonnan klimátiko ekstremo promé ku 2027, i evaluashon regular pa midi progreso.

Segun e plan, algun di e promé medidanan lo bira visibel entre 2026 i 2027. Entre nan tin mas palunan bèrdè, sitionan pa fresku i mehorashon di drenahe den barionan di prioridat, restorashon di palu di mangel i rif, proyektonan piloto den agrikultura inteligente i inisio di investigashonnan riba salú di rif, awa di tera i efektonan di kalor.

E dokumento tambe ta pone enfasis riba preparashon pa situashonnan di emergensia. Entre e akshonnan proponé tin reserva stratégiko di awa i kuminda, refugionan ku energia i sistema propio di awa, i un sistema den kuater idioma di atvertensia pa tempu severo.

Ku aprobashon di e Plan di Klima, enfoke awor ta pasa na e implementashon di e medidanan den e añanan benidero.

E lema ku alumnonan di grupo 8B a formulá durante e proseso ta resumí e mensahe sentral di e plan: “Nos Isla, Nos Responsabilidat”.