Ku un meskla di orguyo, patriotismo i gratitut, komunidat Peruano ku ta biba na Boneiru a selebrá 205 aña di independensia di nan pais natal. Durante e selebrashon, e integrantenan di e komunidat a rindi homenage na nan patria i yama danki na e gobièrnu lokal pa e akohida na Bonieru.

E selebrashon tabata un momento spesial di konekshon i union pa e peruanonan ku ta biba leu di nan kas. Roberto Bailón a duna un splikashon mas detayá tokante e esensia di e fecha históriko akí, kòrdando tur presente riba e lucha pa libertat i e balornan ku ta unifiká nan komo nashon.

E evento a konta tambe ku e presensia di Dayana Villanueva, koordinadora di Konsulado di Perú na Panamá. Den su diskurso, el a enfatisá ku e konsulado ta un medio di ayudo pa e komunidat Peruano na Boneiru. El a boga pa e fasilitashon di trámite di dokumentonan esensial, manera sakamentu òf renovashon di sédula, asina sigurando ku e siudadanonan ta keda ku nan papelnan na òrdu.

Por ultimo, Xiomara Villanueva, sekretaria di e Komunidat Peruana na Boneiru, a ekspresá su profundo gratitut i a manda un pabien di kurason na tur su paisano nan. Villanueva a duna di konosé ku ta un honor pa por reuní i homenagiá e bandera i e himno di Perú. El a suprayá ku esaki ta un signo di respèt, amor i union pa nan pais natal, demostrando ku identidat peruano ta keda bibu, maske nan ta leu di nan tera natal.

Advertisement