Frakshon M21, bou di liderato di Désirée E. Coffie, a entregá un karta na Gezaghèber di Boneiru, señor John Soliano, pidiendo su intervenshon pa yuda resolvé e impase polítiko i atministrativo aktual na Boneiru.

Den e karta, Coffie ta ekspresá su preokupashon tokante e situashon polítiko aktual i e efektonan negativo ku esaki ta tin riba e konfiansa di pueblo den e institutonan gubernamental. Segun M21, e imágen di Konseho Insular i Kolegio Ehekutivo a sufri daño konsiderabel, miéntras ku e konfiansa di komunidat den gobièrnu lokal a baha konsiderabelmente.

M21 ta atvirtí tambe ku, si e situashon no mehorá, Boneiru por drenta den un krísis gubernamental mas profundo. Segun e frakshon, esaki por resultá den evaluashon òf akshonnan adishonal di partí di outoridatnan di Reino, inkluyendo e minister di Asuntunan Interno i Relashonnan di Reino na Hulanda.

Pa evitá un eskalashon di e problema, M21 ta proponé ku un komishon independiente di mediashon wordu instalá. E komishon lo mester ta komponé di personanan neutral, sin afiliashon polítiko, ku por yuda restablesé dialogo entre e partídonan envolví i buska solushonnan pa e impase aktual.

Den su karta, Coffie a indiká ku na su opinion no ta nesesario pa e situashon yega na un punto di intervenshon gubernamental. Esei ta e motibu pakiko el a hasi un yamada na Gezaghèber pa tuma e inisiativa i reuní tur e partídonan den un proseso di mediashon.

M21 a pidi tambe un enkuentro personal ku e Gezaghèber pa por duna un splikashon mas amplio tokante e propuesta.

Ku e inisiativa aki, e partido ta spera di kontribuí na restablesimentu di konfiansa den gobièrnu i na un solushon konstruktivo pa desafionan polítiko aktual na Boneiru.

Advertisement