Entidat Públiko Boneiru (OLB) a inisiá un proyekto ku lo dura un total di 14 siman pa limpia, drecha i reordená e tereno di gobièrnu ku ta keda situá banda di e kompleho deportivo na Stadion di Playa. E akshon aki ta bin komo un paso nesesario pa garantisá seguridat di tur bishitante i restourá òrdu riba e tereno públiko aki.

Durante añanan largu di uso sin pèrmitnan nesesario, e tereno a akumulá ophetonan i strukturanan ku a krea situashonnan ku awe ta frena e desaroyo di e área i ta representá un riesgo real pa e seguridat di bishitantenan. Pa atendé e problema aki di rais, Directie  Toezicht en Handhaving ya a sostené reunionnan ku e partidonan envolví pa asina yega na un solushon hustu i duradero pa e area.

Departamento di Taskforce lo ta den un ròl di sosten pa sigurá ku tur kos ta kana na un manera responsabel. Sinembargo, pa trabounan i moveshon di mashinnan pisá por tuma lugá sin ningun tipo di aksidente, OLB ta pidi e kooperashon di komunidat i usadónan di e tereno.

E departamento mes lo yuda i guia  kada stap di e proseso aki, pa garantisá ku e reorganisashon ta tuma lugá na un manera legal, organisá i, mas ku tur kos seif pa tur hende enbolbí.

Sherman Blanken, hefe di departamento di Proyekto i Taskforce di OLB, a splika ku e meta di e proyekto di 14 siman aki ta pa pone tereno den un estado sigur, limpi i bon strukturá bèk. 

Advertisement