Mohamad A, Un hòmber di 33 aña ku a presentá e siman aki dilanti korte na Den Haag, sospechá di a prepará un atake violento kontra Prensès Amalia, heredero di e trono hulandes, i su ruman menor, Prensès Alexia. E kaso a hala basta atenshon na Hulanda debí na e detayenan fèrfelu ku a sali na kla durante tratamentu di e kaso.

E sospechoso a keda detené na febrüari último, i su kaso na korte riba djaluna 4 di mei 2026 a revelá evidensianan preokupante ku outoridatnan a haña den su poder.

Segun Ministerio Públiko (OM) na Hulanda, ora a arestá e hòmber, outoridatnan a konfiská artíkulonan ku ta indiká un intenshon serio i ku e persona aki ta un ekstremista.

E sospechoso tabatin dos hacha den su poder. Riba e armanan aki tabatin grabá e nòmber "Alexia", huntu ku e palabra "Mossad" i e saludo nazi "Sieg Heil".

Tambe a haña un nota skirbí na man ku e nòmbernan di e dos prensèsnan, Amalia i Alexia, banda di e palabra na hulandes "Bloedbad" (baño di sanger).

E fiskal ta akusá e hòmber di a hasi preparashonnan konkreto pa e atake den e área di Den Haag durante luna di febrüari.

Pa Prensès Amalia, esaki ta un biaha mas un sla fuerte na su seguridat personal. Ya pa algun aña kaba, e ta biba bou di medidanan di seguridat hopi riguroso

Na 2022, Amalia mester a bandoná su bida di studiante na Amsterdam i bolbe biba na palasio debí na menasanan serio for di e mundu di krímennan organisá. Mas despues pa por a haña un poko mas libertat, el a biba i studia pa algun tempu na Spaña (Madrid) den sekreto, un periodo ku el a deskribí despues komo un tempu difísil pero nesesario. Awor e kaso nobo aki ta bolbe enfatisá e riesgo konstante ku Amalia komo futuro reina, ta enfrentá den e tempu aktual.

E bista di e siman aki tabata un seshon prosedural pa determiná kiko ta e siguiente pasonan den e huisio. E sospechoso lo keda den enkarselá miéntras investigashonnan sikiátriko i polisial ta kontinuá.

Awor korte lo mester determiná si e hòmber aki a aktua for di un ideologia ekstremista òf si tin problemanan di salú mental envolví. Pa awor, seguridat rondó di e rumannan real a keda un prioridat máksimo pa e servisio di seguridat hulandes.

Advertisement