Entidat Públiko Boneiru (OLB), Tourism Corporation Bonaire (TCB) i Bonaire Hotel and Tourism Association (BONHATA) a firma un Memorandum of Understanding (MoU). Ku e akuerdo aki, e tres partidonan aki ta ekspresá nan intenshon pa traha huntu pa e próksimo tres añanan riba un vishon kompartí i re-generativo pa turismo di nos isla.

Turismo ta un pilá ekonómiko prinsipal pa Boneiru, i ta duna un kontribushon di aproksimadamente 50 porshento di e produkto interno bruto. Na aña 2025, entradanan di belasting turístiko a yega na un suma di mas o ménos 16,9 mion dòler. Apesar di e sifranan aki, e sektor ta konfrontá algun desafio ku ta eksigí un ekilibrio entre kresementu ekonómiko, konservashon di naturalesa i kalidat di bida di habitantenan.

Advertisement

E kolaborashon entre e partidonan ta konsentrá riba tres tema di trabou prinsipal:

• Destinashon prepará pa futuro: Desaroyo di Boneiru komo un destinashon resiliente, kaminda kapasidat di e isla pa soportá kresementu.
• Konekshon aéreo: Desaroyo i garantia pa konekshonnan aéreo internashonal pa nos isla.
• Uso di rekursonan: E uso óptimo i transparente di medionan públiko i privá, inkluyendo eksplorashon di un modelo di finansiamentu struktural pa TCB.

Pa loke ta implementashon i ehekushon di e MoU, e partidonan a akordá e siguiente pasonan i struktura di trabou:

• E partidonan lo reuní por lo ménos un biaha pa trimèster.
• Mester instalá un grupo di trabou spesífiko pa kada un di e tres temanan di enfoke.
• Denter di un término di seis luna, lo tradusí kontenido di e MoU den un plan di akshon ku ta kontené metanan tangibel.
• E akuerdo tin un durashon di tres aña i lo pasa dor di un evaluashon anual.

Riba término mas largu, TCB lo desaroyá su mes pa bira un organisashon di maneho di destinashon i tambe lo formulá Tourism Vision & Roadmap 2027–2037, den kual tantu Entidat Públiko Boneiru komo BONHATA lo forma parti di e ekipo inisial.

For di un punto di bista legal, e MoU aki no ta mará hurídikamente. Pa e puntonan ku por tin konsekuensia pa Entidat Públiko Boneiru, lo mester tin un desishon separá.

E firmanan i representantenan ku a duna nan sosten na e akuerdo aki ta inkluí Jennifer Mohamedjoenoes (Diputado di Finansa i Turismo), Elesiër Angel (direktor di Tourism Corporation Bonaire), Veroesjka de Windt (direktor di BONHATA) i konsehero Jolinda Craane.