Un kandela gigantesko a destruí un parti grandi di un sentro di data den e zona industrial di Almere-Buiten 7 di mei, kousando un káos digital ku a afektá míles di usuario i empresa. E huma pretu i diki tabata visibel for di un distansia, miéntras ku kuerpo di bombero tabata lucha pa evitá ku e kandela ta plama pa edifisionan bisiña.

E insidente aki a lanta un alerta kòrá den e sektor di teknologia, ya ku e edifisio afektá tabata importante pa konekshon di internèt i servisionan di "cloud" den region. Konsekuensianan di e kandela a bai mas leu ku daño material na e edifisio, e data center a sali for di servisio.

Mesora despues di e kandela, diferente plataforma digital i servisionan di gobièrnu a kuminsá duna fayo, lagando usuarionan sin akseso na dato i kuentanan online. Hopi empresa ku ta dependé di e data center pa nan operashonnan diario mester a para nan trabou, kousando pèrdidanan ekonómiko signifikante, miéntras e servisionan tabata purba di "switch" pa backup na otro lokalidat.

Ademas, e konekshon di internet den sierto partinan di Almere i besindario a bira sumamente slow òf a kai kompletamente, loke a stroba tantu trabou for di kas komo komunikashon di emergensia den e área. Téknikonan a trata pa purba restourá servisionan mas pronto posibel, pero e daño na e hardwarenan a nifiká ku sierto sistemanan lo keda for di servisio pa un tempu mas largu.

Bomberonan a logra dominá e kandela despues di un esfuerso intensivo, pero e trabou pa por a dominá e kandela den e edifisio a kontinuá durante anochi. Pa awor tur hende mester keda leu for di e zona i pa usuarionan di servisionan afektá mester tene pasenshi miéntras ta purba di stabilisá ret digital di nobo den próksimo dianan.

Advertisement