Bonaire Human Rights Organization (BHRO) ta deklará ku e konflikto aktual tokante piskamentu tradishonal di masbango no ta simplemente un asuntu di piskamentu òf konservashon, sino un tema di derechonan humano, derechonan kultural i derechonan di e pueblo Boneriano.

Segun BHRO, piskamentu di masbango ku reda ta un tradishon ku a pasa di generashon pa generashon i ta forma parti di identidat, kultura i manera di biba di Bonerianonan. E organisashon ta argumentá ku regulashonnan ku ta limitá e práktikanan aki mester respetá derecho di un pueblo pa mantené su herensia kultural i tradishonnan.

Fundadó di BHRO, James Finies, a bisa ku pa hopi Boneriano e asuntu no ta tokante piska solamente. “E ta tokante nos derecho pa preservá nos kultura, nos identidat i nos konekshon históriko ku laman,” el a deklará.

BHRO a ekspresá tambe preokupashon tokante reportahenan ku piskadónan keda konfrontá i intimidá pa outoridatnan di haf na momento ku nan tabata ehekutando nan aktividatnan tradishonal di piskamentu. Segun reportahenan, e insidentenan aki ta relashoná ku regulashonnan di konservashon i protekshon manehá pa STINAPA i apliká den koperashon ku e ofisina di e Havenmeester. Segun e organisashon, protekshon di naturalesa mester bai man den man ku rèspèt pa derechonan humano i partisipashon di komunidat lokal den desishonnan ku ta afektá nan manera di biba.

E organisashon ta mira e debate riba masbango komo parti di un diskushon mas amplio tokante e protekshon di derechonan, kultura i futuro di e pueblo Boneriano.

Advertisement